SUPLEMENTAZIOA

Lehiakorra den atleta bat edo egoera fisiko egokian eta gihartuta egotea gustuko izanez gero, ziur, zure errendimendua hobetzea izango dela gaur egun buruan duzun helburuetako bat. Gure planetako biztanleek haien buruan kirol suplementazioaren inguruko galdera ugari dituzte, askok honek emaitza azkarrak, eraginkorrak eta esfortzu gabekoak ekarriko dizkietela pentsatzen dute. Baina, benetan erabilgarriak dira? eta seguruak?

Jakina denez, egungo kirolari ugarik haien irudia eraikitzerakoan suplementazioak paper garrantzitsua jokatzen du eta beste askok desinformazioa dela eta ez dute erabiltzen arazoak ekarriko dizkietela pentsatuz. Caño-k (d.g) idatzitako artikuluan adierazi bezala: “pertsona bakoitzaren helburua eta ingurunea desberdindu behar dira. Egiten den jarduera fisikoa ere kontutan hartu beharko da. Ez da berdina izango amateur den kirolaria edo profesionalki jarduten duen kirolari batek gorputzarentzat beharko dituen mantenugaiak”. Hots, pertsona bakoitzak bere gorputza ezagutu beharko du eta dietari esker hartzen dituen mantenugaiak kontutan hartuta suplementazioa hartzea beharrezkoa izango luke. Baina beste kasu batzuetan, haien jatorduetan beharrezkoak dituzten elikagaiekin eta mantenugaiekin suplementazioa hartzea ez da beharrezkoa izango .


                                    


Hala ere, ez da soilik begirada suplementazioan jarri behar, entrenamendu mota eta honen planifikazioak zer esan handia izango du etorkizuneko irudia eraikitzean. Izan ere, entrenamenduak aurretik planifikatu beharko dira eta pertsona bakoitzaren helburu eta beharren araberakoak izan beharko dira. Hau da, saskibaloi jokalaria zara eta partida bati ekin eta bi minututara ez zara aurrera jarraitzeko gai, orduan entrenamendu kardiobaskularra egin beharko zenuke. Aldiz, futbolean jokatzen duzu eta ez zara gai 20 metroko pase luzea egiteko, orduan hanken potentzia eta indarra entrenatzea komenigarria izango litzateke. Hala ere, ezer entrenatu aurretik beharrezkoa izango da mediku bati bisita egin eta honen onarpena jaso beharko duzu.

Egia da, suplementazioa saltzen duten zenbait iragarkietan haientzat egokienak diren argazkiak erabiltzen dituztela eta publikoak emaitza horiek lortzea erraza dela pentsatzen du, askotan gezurra irudikatzen badute ere. Multinazional guztien azken helburua dirua irabaztea da, geroz eta suplementazio produktu gehiago komertzializatuz nahiz eta saldutakoa gezurra izan. Honen aurrean eta desinformazio honen ondorioz gazteria eta haurrak izango dira geroz eta erosle ohikoagoak haien gorputzarekin ez direlako ondo sentitzen. Baina, hauen berririk eduki gabe eta hauek magia egiten dutela pentsatuz, ez dira emaitzak lortuko, aldiz, gaixotasun desberdinak eragin ditzakete.


                                          

Amaitzeko, suplementazioa hartzen hasi aurretik kirolariek haien helburua zein den jakin eta hartuko dutenaren informazio espezifikoa jaso beharko dute. Horrez gain, ez dute ahaztu behar haien elikadurari gehitu daitekeen gehigarri bat izango dela, inoiz ez ordezkorik. Beraz, gai hau tabu moduan bizi izan dugu azken urteetan eta hori dela medio pertsona ugariri iruzurrak saldu dizkiete, askotan informazio falta edo informazio desegokia jasotzearen ondorioz.


Hori horrela izanik hurrengo bloggean suplementazioaren inguruko informazioa jasotzeko aukera edukiko du irakurleak, bertan, zer den, zertarako balio duen, zergatik kontsumitu behar diren eta zein mota dauden azalduko delarik, beste zenbait konturen artean.